ప్రభుత్వ భూముల అక్రమాలపై ప్రశ్నిస్తే నోటీసులా..? మీడియాను భయపెట్టే ప్రయత్నం సరికాదు
తెలంగాణ మాల జర్నలిస్ట్ యూనియన్ జిల్లా అధ్యక్షులు చందా శ్రీనివాస్
ఇ నివాస్ న్యూస్ - తెలంగాణ / మహబూబాబాద్ / మరిపెడ, ఉప్పుల రమేష్ : మహబూబాబాద్ జిల్లా కురవి మండల కేంద్రంలో జరుగుతున్న ప్రభుత్వ భూముల అక్రమాలపై ఆధారాలతో వార్తలు ప్రచురించిన జర్నలిస్టు బోయిని నరేందర్ ముదిరాజ్కు లీగల్ నోటీసులు పంపడం సరికాదని తెలంగాణ మాల జర్నలిస్టు యూనియన్ జిల్లా అధ్యక్షుడు చందా శ్రీనివాస్ తీవ్రంగా ఖండించారు. గురువారం కురవి మండల కేంద్రంలో తెలంగాణ మాల జర్నలిస్టు యూనియన్ ఆధ్వర్యంలో ఏర్పాటు చేసిన సమావేశంలో ఆయన ముఖ్య అతిథిగా పాల్గొని మాట్లాడారు. జర్నలిస్టు నరేందర్ ముదిరాజ్ సంఘానికి తెలిపిన వివరాల ప్రకారం, కురవి మండలంలోని 747 సర్వే నంబర్కు చెందిన విలువైన ప్రభుత్వ భూమిని సుమారు మూడేళ్ల క్రితం ఓ రెవెన్యూ శాఖ ఉద్యోగి అక్రమంగా విక్రయానికి గురి చేసిన విషయాన్ని జర్నలిస్టులు పక్కా ఆధారాలతో వెలుగులోకి తెచ్చారని తెలిపారు. ప్రభుత్వ భూముల అక్రమాలపై ప్రశ్నించిన జర్నలిస్టుకు లీగల్ నోటీసులు పంపడం ప్రజాస్వామ్య విలువలకు విరుద్ధమని, ఇది స్వేచ్ఛాయుత మీడియాను భయపెట్టే ప్రయత్నంగా ఆయన అభివర్ణించారు. ప్రజల తరఫున ప్రశ్నించే మీడియాను అణచివేయాలని చూస్తే జర్నలిస్టు సంఘాలు మౌనంగా ఉండవని స్పష్టం చేశారు. ప్రభుత్వ భూముల అక్రమాలపై నిష్పక్షపాతంగా విచారణ జరిపి, బాధ్యులపై కఠిన చర్యలు తీసుకోవాలని డిమాండ్ చేశారు. జర్నలిస్టుల హక్కులు, భద్రత కోసం తెలంగాణ మాల జర్నలిస్టు యూనియన్ ఎల్లప్పుడూ అండగా నిలుస్తుందని చందా శ్రీనివాస్ ప్రకటించారు. ఈ సమావేశంలో తెలంగాణ మాల జర్నలిస్టు యూనియన్ జిల్లా ప్రధాన కార్యదర్శి బేతమళ్ళ సహాదేవ్, జిల్లా గౌరవ అధ్యక్షుడు బొడ్డు అశోక్, జిల్లా నాయకులు గండమాల రోషయ్య, జర్నలిస్టు బోయిని నరేందర్ ముదిరాజ్ తదితరులు పాల్గొన్నారు.
Admin
E Nivas News
మరిన్ని వార్తలు
Developed By :
