రైతు లేకపోతే రాజ్యం లేదు....! నేటి రైతు విలువే రేపటి సమాజం
ఇ నివాస్ న్యూస్ - తెలంగాణ / పెద్దపల్లి /మంథని : భారతదేశం వ్యవసాయాధారిత దేశం. కోట్లాది ప్రజల జీవనాధారం వ్యవసాయం. అలాంటి వ్యవసాయానికి ప్రాణం పోసే రైతు సేవలను గుర్తుచేసుకునే రోజు జాతీయ రైతు దినోత్సవం. ప్రతి సంవత్సరం డిసెంబర్ 23న ఈ దినోత్సవాన్ని జరుపుకుంటారు. ఈ రోజు భారతదేశ మాజీ ప్రధాని రైతుల కోసం తన జీవితాన్ని అంకితం చేసిన చౌధరి చరణ్ సింగ్ గారి జయంతి సందర్భంగా నిర్వహించబడుతుంది. రైతు దేశానికి వెన్నెముక "రైతు లేనిదే రాజ్యం లేదు" అన్న మాట కేవలం నినాదం కాదు, అది నిజం. మనం తినే ప్రతి గింజ వెనుక రైతు చెమట ఉంది. ఉదయం లేచిన దగ్గర నుంచి రాత్రి నిద్రపోయే వరకూ మన జీవితం రైతుపై ఆధారపడి ఉంది. బియ్యం, గోధుమలు, కూరగాయలు, పండ్లు, పాలు అన్నీ రైతు కృషి ఫలితమే. *జాతీయ రైతు దినోత్సవం ప్రాముఖ్యత* ఈ దినోత్సవం ద్వారా రైతుల కష్టాలను సమాజానికి తెలియజేయడం,వ్యవసాయ రంగ సమస్యలపై చర్చ జరగడం, యువతను వ్యవసాయానికి ఆకర్షించడం, రైతుల హక్కులు, భద్రతలపై అవగాహన పెంపొందించడం అనే ముఖ్య ఉద్దేశాలు నెరవేరుతాయి. రైతు జీవితంలోని సవాళ్లు నేటి రైతు అనేక సమస్యలను ఎదుర్కొంటున్నాడు. వాతావరణ మార్పులు, పంటలకు సరైన ధరలు లేకపోవడం, అప్పుల భారం, ఆధునిక సాంకేతిక పరిజ్ఞానం అందకపోవడం, మధ్యవర్తుల దోపిడి ఈ కారణాల వల్ల రైతు ఆర్థికంగా, మానసికంగా నలిగిపోతున్నాడు. *రేపటి సమాజానికి రైతు అవసరమా* రేపటి సమాజానికి రైతు అవసరమా అంటె ఖచ్చితంగా ఉంది. ఇంకా ఎక్కువగా ఉందనె చెప్పవచ్చు. సాంకేతికత ఎంత అభివృద్ధి చెందినా, ఆర్టిఫిషియల్ ఇంటెలిజెన్స్ వచ్చినా, ఆహారం తయారుచేసే యంత్రం ఇప్పటికీ పూర్తిగా రైతును భర్తీ చేయలేదు. ల్యాబ్ ఫుడ్ వచ్చినా, ప్రకృతి నుంచి వచ్చే ఆహారానికి ఉన్న విలువ వేరే. రైతు లేకపోతే ఏమవుతుంది అనే ప్రశ్న ఉత్పన్నమైతే ఆహార భద్రత ప్రమాదంలో పడుతుందని చెప్పవచ్చు. దేశం దిగుమతులపై ఆధారపడాల్సి వస్తుంది. గ్రామీణ ఆర్థిక వ్యవస్థ కూలిపోతుంది. ప్రకృతితో మానవ సంబంధం తెగిపోతుంది. అంటే రైతు లేకపోతే సమాజమే నిలబడదు. *రేపటి రైతు ఎలా ఉండాలి?* రేపటి సమాజానికి చదువుకున్న, సాంకేతిక పరిజ్ఞానం తెలిసిన, ఆర్గానిక్, సహజ వ్యవసాయం చేస్తూ మార్కెట్ అవగాహన ఉన్న రైతు అవసరం. రైతును "బలహీన వర్గం" గా కాకుండా "ఆహార నిర్మాత";గా గౌరవించాలి. జాతీయ రైతు దినోత్సవం ఒక వేడుక మాత్రమే కాదు. రైతుపట్ల మన బాధ్యతను గుర్తుచేసే రోజు. రైతు గతానికి మాత్రమే చెందిన వ్యక్తి కాదు, భవిష్యత్ తరాలకు దారి చూపే నాయకుడు. రేపటి సమాజానికి రైతు అవసరం ఉందా? అన్న ప్రశ్నకు సమాధానం ఒకటే రైతు లేకపోతే రేపటి సమాజమే లేదు. రైతును ఆదరించటం అంటే "మన భవిష్యత్తును కాపాడుకోవటమే". --డా.ఓర్సు రాయలింగు 9849446027
Admin
E Nivas News
మరిన్ని వార్తలు
Developed By :
