ఉపాధ్యాయులు కేవలం ఉద్యోగులు కాదు..! సమాజ నిర్మాణ శిల్పులు
ఇ నివాస్ న్యూస్ - తెలంగాణ / పెద్దపల్లి /మంథని : సమాజం ముందుకు సాగాలంటే భవిష్యత్ తరాలను తీర్చిదిద్దే శక్తి అవసరం. ఆ శక్తికి రూపం, దిశ, విలువలు ఇవ్వగలవారు ఉపాధ్యాయులు. ఉపాధ్యాయులను కేవలం జీతం తీసుకునే ఉద్యోగులుగా చూడడం వారి మహత్తును తక్కువ చేయడమే అవుతుంది. నిజానికి ఉపాధ్యాయులు సమాజ నిర్మాణానికి మూలస్తంభాలు,దేశ భవిష్యత్తుకు శిల్పులు. *జ్ఞానం మాత్రమే కాదు!జీవన విలువల బోధన* ఉపాధ్యాయుల పని పాఠ్యపుస్తకాల పాఠాలు చెప్పడంలోనే ముగిసిపోదు. నిజాయితీ, క్రమశిక్షణ, మానవత్వం, సమానత్వం, దేశభక్తి వంటి జీవన విలువలను పిల్లల మనసుల్లో నాటేది ఉపాధ్యాయులే. ఒక విద్యార్థి జీవితంలో సత్యానికి నిలబడటం, తప్పును ఎదిరించడం నేర్చుకుంటే, దాని వెనుక ఎక్కడో ఒక ఉపాధ్యాయుడి ప్రభావం ఉంటుంది. *వ్యక్తి నుంచి పౌరుడి వరకు ప్రయాణం* పిల్లవాడు విద్యార్థిగా పాఠశాలలో అడుగుపెడతాడు. బాధ్యతగల పౌరుడిగా సమాజంలో అడుగుపెడతాడు. ఈ రెండు దశల మధ్యనున్న వారధి ఉపాధ్యాయుడే. దేశ చట్టాలను గౌరవించే పౌరులు, సమాజ బాధ్యతలను అర్థం చేసుకునే మనుషులు తయారవ్వడంలో ఉపాధ్యాయుల పాత్ర అపారమైనది. *సామాజిక మార్పుకు మార్గదర్శకులు* అజ్ఞానం, మూఢనమ్మకాలు, అసమానతలు సమాజాన్ని వెనక్కి లాగుతాయి. వాటికి వ్యతిరేకంగా ప్రశ్నించే తత్వాన్ని పెంచేది ఉపాధ్యాయులే. విద్య ద్వారా సమాన అవకాశాలు కల్పించి,బలహీన వర్గాలను బలంగా నిలబెట్టే శక్తి ఉపాధ్యాయుల దగ్గరే ఉంటుంది. అందుకే ప్రతి సామాజిక మార్పు వెనుక ఒక ఉపాధ్యాయుని మౌన సేవ కనిపిస్తుంది. *ఆర్థిక పురోగతికి బీజం* విద్య లేకుండా అభివృద్ధి అసాధ్యం. నైపుణ్యం గల కార్మికులు, శాస్త్రవేత్తలు, వైద్యులు, ఇంజినీర్లు, పాలకులు వీరందరి ఆరంభ బాట పాఠశాలే. ఆ బాటను సరిగా వేయగలవారు ఉపాధ్యాయులు. ఒక ఉపాధ్యాయుడు సమాజానికి వందల మంది నిపుణులను అందిస్తాడు. ఇది ఏ ఇతర వృత్తికైనా సాధ్యం కాని సేవ. *త్యాగం, సహనం, సేవా భావం* ఉపాధ్యాయ వృత్తిలో ఉన్నవారు అనేక కష్టాలను భరిస్తారు. పరిమిత వనరులు, అధిక పనిభారం, సమాజంలో తగిన గుర్తింపు లేకపోయినా, విద్యార్థుల భవిష్యత్తు కోసం అంకితభావంతో పనిచేస్తారు. ఈ త్యాగం వారిని సాధారణ ఉద్యోగుల స్థాయికి మించిన వారిగా నిలబెడుతుంది. *ఉపాధ్యాయులకు గౌరవం – సమాజ బాధ్యత* ఉపాధ్యాయులను గౌరవించడం అంటే విద్యను గౌరవించడం.విద్యను గౌరవించడం అంటే సమాజ భవిష్యత్తును కాపాడుకోవడం. ఉపాధ్యాయుల మాటకు విలువ ఇచ్చే సమాజమే నైతికంగా, సాంస్కృతికంగా, ఆర్థికంగా ఎదుగుతుంది. ఉపాధ్యాయులు కేవలం ఉద్యోగులు కాదు. వారు దీపాల్లా వెలుగునిస్తూ తరతరాల జీవితాలను ప్రకాశింపజేస్తారు. వారు సమాజానికి శిల్పులు, దేశానికి దిక్సూచి. ఉపాధ్యాయుల సేవను గుర్తించి, గౌరవించి, వారికి తగిన స్థానం కల్పించడమే సుస్థిర సమాజ నిర్మాణానికి పునాది. --డా.ఓర్సు రాయలింగు 9849446027
Admin
E Nivas News
మరిన్ని వార్తలు
Developed By :
