మహిళా సిబ్బంది అన్ని రకాల విధులకు సంసిద్ధమై ఉండాలి...
ఎస్పీ అఖిల్ మహాజన్
ఇ నివాస్ న్యూస్ - తెలంగాణ / చీఫ్ బ్యూరో, కొండపర్తి ప్రసన్నకుమార్ : మహిళా సిబ్బందికి ఆత్మస్థైర్యాన్ని పెంచేలా చేసి, అన్ని రకాల పరిస్థితులలో, విధులలో సంసిద్ధంగా ఉండేలా కఠినమైన శిక్షణ అందించనున్నట్లు ఆదిలాబాద్ జిల్లా ఎస్పీ అఖిల్ మహాజన్ బుధవారం తెలిపారు . మూడు రోజులపాటు మహిళా సిబ్బందికి మార్షల్ ఆర్ట్స్ మరియు కరాటే, లాఠీ డ్రిల్ లాంటి వాటిపై పోలీసు ఏఆర్ హెడ్ క్వార్టర్స్ లో శిక్షణను ప్రారంభించారు. ఈ కార్యక్రమంలో మహిళా సిబ్బందికి నిష్ణాతులైన కరాటే మాస్టర్ ముకేష్ చే శిక్షణ అందించనున్నట్లు తెలిపారు. ఈ శిక్షణ ముఖ్య ఉద్దేశ్యం మహిళా సిబ్బందిని శారీరకంగా, మానసికంగా మరియు వృత్తిపరంగా మరింత దృఢంగా తీర్చిదిద్దడం ప్రస్తుత కాలంలో మహిళా పోలీసులపై పెరుగుతున్న బాధ్యతలను దృష్టిలో ఉంచుకుని స్వీయ రక్షణ నైపుణ్యాలతో పాటు చట్టపరమైన అవగాహన, ప్రవర్తనా పద్ధతులు, సంఘటన స్థలంలో తీసుకోవాల్సిన జాగ్రత్తలపై సమగ్ర శిక్షణ అందించడం జరుగుతుందన్నారు.శిక్షణలో భాగంగా లాఠీ డ్రిల్, కరాటే, ప్రాథమిక స్వీయ రక్షణ చిట్కాలు, అత్యవసర పరిస్థితుల్లో స్పందించే విధానం వంటి అంశాలపై ప్రాక్టికల్ సెషన్లు నిర్వహిస్తారు. ఆకతాయిలు, పోకిరిల ఆగడాలకు సమర్థంగా ఎదుర్కొనే ధైర్యం, నైపుణ్యాలు పెంపొందించడమే లక్ష్యంగా శిక్షణ కొనసాగనున్నది. ఖైదీలు, నేరస్తులతో వ్యవహరించే సమయంలో పాటించాల్సిన నియమాలు, మహిళా ఖైదీల భద్రత, పరిరక్షణ వంటి అంశాలపై ప్రత్యేక తరగతులు ఏర్పాటు చేశారు. అదనంగా శాంతిభద్రతల సమస్యలు, ధర్నాలు, ర్యాలీలు, ఉత్సవాల సమయంలో మహిళా సిబ్బంది నిర్వర్తించాల్సిన విధులపై వ్యూహాత్మక శిక్షణ అందించడం జరుగుతుంది. ఆత్మస్థైర్యాన్ని, మానసిక ధైర్యాన్ని పెంపొందించే కార్యక్రమాలు జరగనున్నట్లు తెలిపారు. మహిళా సిబ్బంది పురుష సిబ్బందితో సమానంగా అన్ని రకాల విధుల్లో సమర్థంగా పాల్గొనేలా తీర్చిదిద్దడమే ఈ శిక్షణ ప్రధాన లక్ష్యమని పేర్కొన్నారు. మహిళా సిబ్బంది స్వీయ రక్షణతో పాటు సమాజ రక్షణలో కీలకపాత్ర పోషిస్తూ పోలీస్ శాఖకు గౌరవం తీసుకురావాలని ఆయన ఆకాంక్షించారు. ఈ కార్యక్రమంలో అదనపు ఎస్పీ పరిపాలన పి మౌనిక, ఏఆర్ డి.ఎస్.పి కమతం ఇంద్రవర్ధన్, పట్టణ సిఐలు బి సునీల్ కుమార్, కె నాగరాజు, ప్రేమ్ కుమార్, రిజర్వ్ ఇన్స్పెక్టర్ డి వెంకటి, ప్రైవేట్ మహిళ కరాటే మాస్టర్, సిబ్బంది తదితరులు పాల్గొన్నారు.
Admin
E Nivas News
మరిన్ని వార్తలు
Developed By :
