చేనేత కార్మికుల కళా నైపుణ్యానికి, కష్టానికి, అంకితభావానికి నమస్తే..
ఇ నివాస్ న్యూస్ - తెలంగాణ / చీఫ్ బ్యూరో, కొండపర్తి ప్రసన్నకుమార్ : మన సంస్కృతి, సంప్రదాయాలను ప్రపంచానికి చాటుతున్న నేతన్నల కళా నైపుణ్యానికి, కష్టానికి, అంకితభావానికి నమస్తే అని మాజీ మంత్రి హరీశ్ రావు పేర్కొన్నారు. శుక్రవారంజాతీయ చేనేత దినోత్సవం సందర్భంగా ‘ఎక్స్’ వేదికగా చేనేత కార్మికులకు శుభాకాంక్షలు తెలిపారు. చేనేత రంగం అభివృద్ధికి, వారి సంక్షేమానికి ప్రతి ఒక్కరూ అండగా నిలవాలని, నేతన్న బతికితేనే చేనేత కళ బతుకుతుందని పేర్కొన్నారు. అయితే కాంగ్రెస్ ప్రభుత్వం అధికారంలోకి వచ్చిన తర్వాత చేనేత కార్మికుల బతుకులు ఛిద్రమవుతున్నాయని ఆవేదన వ్యక్తం చేశారు. గతంలో కేసీఆర్ ప్రభుత్వం నేతన్నకు చేయూత, నూలు సబ్సిడీ, బతుకమ్మ చీరలు, వర్కర్ టు ఓనర్ వంటి పథకాలతో చేనేత రంగానికి ఊపిరి పోసిందని గుర్తుచేశారు.కాంగ్రెస్ ప్రభుత్వం ఇచ్చి హామీలను మరిచి, ఆ పథకాలన్నింటినీ నిలిపివేసి నేతన్నల జీవితాలను తీవ్ర సంక్షోభంలోకి నెట్టిందని విమర్శించారు. తెలంగాణ కోసం పోరాడిన నేతన్నలు నేడు తమ బతుకుల కోసం పోరాడాల్సిన దుస్థితి ఏర్పడిందని దుయ్యబట్టారు. రాష్ట్రంలో మగ్గాలు మూగబోతున్నాయని, కార్మికుల్లో వలసలు, అప్పులు, ఆత్మహత్యలు పెరిగిపోతున్నాయని హరీశ్ రావు ఆందోళన వ్యక్తం చేశారు. సమాజానికి బట్ట నేసి ఇచ్చే చేతులను కాపాడుకోవాల్సిన బాధ్యత ప్రభుత్వంపై ఉందన్నారు. రాజకీయాలకు అతీతంగా స్పందించి చేనేత రంగాన్ని తక్షణమేఆదుకోవాలని, కార్మికులకు భరోసా కల్పిస్తూ చేనేత రంగానికి పునర్వైభవం తీసుకురావాలని డిమాండ్ చేశారు. నేతన్నను కాపాడుకుందాం, చేనేతను బతికించుకుందాం అని హరీశ్ రావు పిలుపునిచ్చారు.
Admin
E Nivas News
మరిన్ని వార్తలు
Developed By :
